Ajali ya treni ya chini ya ardhi Beijing yasababisha majeruhi zaidi 100

 

Ajali ya treni kati ya treni mbili za chini ya ardhi mjini Beijing imesababisha watu 102 kuvunjika mifupa, vyombo vya habari vya serikali ya China viliripoti.

Zaidi ya watu 500 walipelekwa hospitalini baada ya tukio hilo, lililotokea takriban saa 19:00 kwa saa za huko (11:00 GMT) siku ya Alhamisi.

Treni hizo ziligongana wakati wa theluji nyingi zikishuka kwenye njia ya chini ya ardhi ya Changping. Kufikia Ijumaa asubuhi, watu 423 wameruhusiwa kutoka hospitalini.

Ingawa ajali kama hizo si za kawaida kwenye mtandao wa usafiri wa mji mkuu wa China, dhoruba za theluji ziliripotiwa kusababisha njia kuwa na utelezi. Hili basi lilisababisha "uharibifu wa alama za treni" ambao ulisababisha treni ya kwanza kusimama ghafla, gazeti la China Daily liliripoti, likinukuu mamlaka ya usafiri ya Beijing.

Treni iliyofuata haikuweza kushika breki kwa wakati ilipokuwa ikishuka kwenye njia zenye barafu, na kusababisha kugonga nyuma ya treni ya kwanza.

Athari hiyo ilisababisha mabehewa mawili ya mwisho ya moja ya treni kukatika. Haijulikani ni treni gani ilitenganishwa.

Picha na video zilizochapishwa mtandaoni zinaonyesha wasafiri wakiwa wamejazana kwenye magari, wakiachwa gizani kutokana na kukatika kwa umeme. Wachache walionekana wakitumia nyundo za dharura kuvunja madirisha ili kupata hewa safi. Katika video iliyotumwa kwenye mtandao wa kijamii wa China Weibo, mwanamke ambaye anaonekana kuzirai anaonekana akiwa amelala kwenye viti vingi vya treni. Watu 67 wamesalia hospitalini kwa matibabu, huku 25 wakiwa "chini ya uangalizi", ripoti zilisema. Hakukuwa na vifo.